សម្តេច ហ៊ុន សែន ពិភាក្សាភ្លាម​ៗឲ្យ​បិទ​ផ្នែក​ខ្លះនៃក្រសួង​មហាផ្ទៃតែម្តង ក្រោយពីមន្រ្តីក្រសួងមហាផ្ទៃ មានពាក់ព័ន្ធកូវីដ១៩ ក្នុងសហគមន៍

93

ក្រោយ​រក​ឃើញ​មន្រ្តី​ជាន់ខ្ពស់​បន្ត​បន្ទាប់​នៅ​ក្រសួង​មហាផ្ទៃមាន​ខ្លះ​ជាប់ពាក់ព័ន្ធ​នឹង​ការ​ឆ្លង​កូវីដ ១៩ ក្នុង​សហគមន៍ សម្តេច ហ៊ុន សែន នាយករដ្ឋ​មន្រ្តីនៃ​ព្រះរាជាណាចក្រ​កម្ពុជាបាន​ពិភាក្សា​ពី​លទ្ធភាព​បិទ​ផ្នែក​ណាមួយ​នៃ​ក្រសួង​មហាផ្ទៃ ដើម្បី​បញ្ចៀស​ការ​ឆ្លង​សហគមន៍​កាន់តែ​ច្រើនឡើងៗ។ នេះ​បើ​តាមសារសំឡេង​របស់​សម្តេចបង្ហោះ​ដោយក្រសួង​សុខាភិបាល។

សម្តេច បាន​បញ្ជាក់​ថាក្រសួង​សុខាភិបាល​ពុំ​អាច​បញ្ជាក់ថា​តើ​ការ​ឆ្លង​និង​ចម្លង​ជំងឺ​កូវីដ ១៩ របស់​ភរិយា​ប្រធាន​អគ្គនាយក​ពន្ធនាគារនៅ​ក្នុង​សហគមន៍​ក្នុង​ប្រទេស​កម្ពុជា​លើក​ដំបូង​ថ្មីៗ​នេះ មាន​ប្រភព​ពី​ភ្នំពេញ​ឬ​ពី​សៀមរាប​នោះឡើយ។ ចំនួន​អ្នក​ឆ្លង​កូវីដ ១៩ ក្នុង​ក្របខណ្ឌក្រសួង​មហាផ្ទៃ​និង​ក្រុម​គ្រួសារ​អគ្គនាយក​ពន្ធនាគារមាន​ចំនួន ៨ នាក់​ហើយ​ ដែល​ហេតុការណ៍​នេះ​សម្តេច​ចាត់ទុក​ថា​ជា​ករណី​ធ្ងន់ធ្ងរ​បំផុត​មិន​ធ្លាប់​មាន​សម្រាប់ប្រទេស​កម្ពុជា តាំង​ពីកូវីដ ១៩ មានវត្តមាន​ក្នុង​ប្រទេស​កម្ពុជា​ពី​ដើម​ឆ្នាំ ២០២០ នេះ។លើស​ពី​នេះសម្តេចបានបញ្ជាក់​ថា សម្តេច​កំពុង​ពិភាក្សា​ជាមួយ​សម្តេចក្រឡាហោម​ ស ខេង ដើម្បី​សម្រេច​បិទ​ផ្នែក​ណាមួយឬ​ទាំងស្រុង​​របស់ក្រសួង​មហាផ្ទៃ ហើយ​អនុញ្ញាត​ឲ្យ​មន្រ្តី​ធ្វើការ​ពីផ្ទះ​មក​តែ​ម្តង។ មាន​រដ្ឋមន្រ្តី​ជាន់ខ្ពស់និង​មន្រ្តីក្រោម​ឱវាទ​ជាច្រើន​​មាន​ជាប់ពាក់ព័ន្ធ​លើ​ករណី​ដ័ស្រួចស្រាវ​នេះ​ ដោយ​រួម​ទាំង​សម្តេចក្រឡាហោម​ ស ខេង និង​អ្នក​ពាក់ព័ន្ធ​ប្រហែល​ ៩០ នាក់ ត្រូវ​ធ្វើ​ចត្តាឡីស័ក ១៤ ថ្ងៃ ហើយ​​ក្រសួង​សុខាភិបាលបាន​យក​សំណាកអ្នក​ទាំង​នោះ​ទៅពិនិត្យ​ដើម្បី​រក​វីរុស​កូវីដ ១៩។សម្តេច​បន្ថែម​ទៀត​ថា ចំពោះ​សម្តេច​ផ្ទាល់​នៅ​តែ​ចូលរួម​ក្នុង​ពិធី​បើក​ការដ្ឋានធ្វើ​ផ្លូវ​នៅ​សៀមរាប តែ​ចំនួន​មនុស្ស​ត្រូវ​បន្ថយ​ពី ១ ០០០ នាក់​មក​ត្រឹម ១៥០ នាក់ប៉ុណ្ណោះ​ដើម្បី​កាត់បន្ថយ​ហានិភ័យ​នៃ​ការ​ឆ្លង​វីរុស​កូវីដ​ ១៩ ដែល​កំពុង​តែ​បង្ក​ព្យុះ​ភ្លៀង​នៅ​កម្ពុជា​នេះ៕